Дозволата за искачување на Монт Еверест, висок 8.849 метри, сега ќе чини 15.000 долари, што е за 36 отсто повеќе од претходната цена од 11.000 долари, која важеше речиси една деценија, објави Ројтерс.
„Надоместокот за дозволата не беше ревидиран долго време. Сега го променивме“, рече генералниот директор на Одделот за туризам, Нарајан Прасад Регми.
Новата цена ќе стапи на сила во септември и ќе важи за сезоната април и мај, како и за стандардната рута долж југоисточната страна на планината, на која за прв пат се искачија Едмунд Хилари и Тензинг Норгај во 1953 година за време на првото успешно искачување на Еверест.
Надоместокот за помалку популарните сезони, од септември до ноември, сега ќе биде 7.500 долари, а за искачувањето во ретко посетената сезона, од декември до февруари, планинарите во иднина ќе треба да издвојат 3.750 долари.
Некои организатори на експедиции велат дека зголемувањето, за кое се дискутира од минатата година, веројатно нема да ги обесхрабри планинарите. Секоја година се издаваат околу 300 дозволи за искачување на Монт Еверест.
Дозволите за искачување, кои претходно важеа 75 дена, сега ќе бидат ограничени на 55 дена.
„Оваа промена нема да влијае на веќе потврдените резервации за експедицијата пролет 2025 година“, рече Инду Гимире, секретар во Министерството за туризам.
Според него, прописите се однесуваат на управувањето со отпадот, социјалното осигурување на работниците на голема надморска височина и зголемувањето на приходите на владата.
Според ревидираните правила, од претстојната пролетна сезона, планинарите на Еверест ќе треба да го вратат изметот назад во базниот камп за соодветно отстранување.
Алпинистите мора да носат биоразградливи кеси за собирање отпад.
Базните кампови обично имаат назначени тоалетни шатори со буриња за собирање човечки отпад за време на експедициите. Меѓутоа, во повисоките кампови, само неколку агенции имаат слични објекти, додека други се потпираат на јами. Многу малку алпинисти користат биоразградливи кеси за транспорт на отпад од врвот.
