Португалската здравствена агенција разгледува можност за забрана на продажба на енергетски пијалоци на лица под 16 години, во време кога слични мерки се дискутираат и во други европски држави.
Веста првично ја објави неделникот Expresso, а ја потврди и Euronews. Генералниот директорат за јавно здравје (DGS), тело при Министерството за здравство, соопшти дека, освен забраната за рекламирање насочено кон лица под 16 години, се предвидува и забрана за продажба на енергетски пијалоци во јавните училишта.
Но, според DGS, овие мерки можат да бидат дополнети за да се заштити здравјето на младите. „Доказите покажуваат дека, освен регулирањето на рекламирањето и достапноста на овие производи на одредени јавни простори, можни се и дополнителни мерки за ограничување на пристапот, како што е забрана на продажба на деца и адолесценти“, велат од институцијата.
Португалските власти внимателно го следат примерот на Велика Британија, каде што е во тек јавна консултација од 12 недели, во која учествуваат здравствени и едукативни експерти, јавноста, како и производители и трговци. И покрај тоа што повеќето супермаркети во Британија доброволно не продаваат вакви пијалоци на деца, до третина од тинејџерите таму сепак ги консумираат секоја недела.
Во Португалија сè уште не постои официјална забрана, но продажбата на енергетски пијалоци во супермаркетите се зголемила за речиси 50% во последните две години. Според DGS, речиси 44.5% од тинејџерите на глобално ниво консумирале вакви пијалоци барем еднаш во изминатата година, а 33.5% во последниот месец.
Во Лисабонскиот регион, истражување од 2014 година покажало дека 42% од тинејџерите пијат енергетски пијалоци. Тоа е особено загрижувачки ако се знае дека една лименка од 500 ml содржи еквивалент на шеќер колку 14 мали кесички (по 4g) и исто толку кофеин колку пет лименки Кока-Кола од 330 ml.
Ваквите пијалоци можат да предизвикаат: забрзана работа на срцето, немир, главоболки, несоница, дехидрација, анксиозност, висок крвен притисок, проблеми со варењето и тресење.
Дополнително, DGS предупредува дека опасноста значително се зголемува кога енергетските пијалоци се мешаат со алкохол – пракса што е сè почеста кај младите.
Во Норвешка, забраната за продажба на енергетски пијалоци на лица под 16 години ќе стапи на сила во јануари. Слични дискусии се водат во Шпанија, Германија, Словенија и Унгарија.
Португалската здравствена агенција најави дека ќе го следи ефектот на мерката во Велика Британија, по што би можеле и официјално да предложат нови регулативи.
