Португалија вети построги правила за јавен пристап до популарна 45-километарска делница од нејзиниот брег, поради загриженост за зголемување на цените на домување и ограничен пристап до плажи како резултат на развојот на луксузни ресорти.
Владата на Португалија и Португалската агенција за животна средина (APA) ветија засилена контрола врз примената на правилата за јавен пристап долж популарниот дел од крајбрежјето, каде што брзиот развој на луксузни одморалишта предизвикува загриженост за цените на становите, ограничувањето на пристапот до плажите и губењето на локалниот идентитет.
Места како Мелидеш, Компорта и Троја привлекоа светски инвеститори и богати туристи последниве години, трансформирајќи камп места и рибарски села во елитни енклави.
Жители и локални бизниси велат дека промените довеле до енормен пораст на трошоците и ограничен пристап до јавни простори, особено плажите на кои многумина пораснале.
APA изврши инспекција на 22 плажи долж таа 45-километарска делница и утврди дека не сите се јавни. Девет плажи имаат ограничен пристап – две со контролиран влез и седум ограничени од приватни ресорти.
Меѓу нив се Троја-Гале и Гале-Фонтањас, каде посетителите мора да покажат лична карта или да поминат низ приватен комплекс за да стигнат до плажата. Во некои случаи, паркирањето е ограничено или далеку од крајбрежјето.
На плажата Гале-Фонтањас, пристапот сега води низ ресортот Кошта Тера, во сопственост на американскиот инвеститор Мајк Мелдман, ко-основач на текилата Casamigos со актерот Џорџ Клуни.
Ресортот располага со приватни спортски терени, органски градини и луксузни содржини.
Министерката за животна средина, Марија да Граса Карваљо, изјави дека никаков нов туристички развој во близина на плажи нема да се одобри на копното без прво да се обезбеди јавен пристап до плажите.
Нема место за локалците
Во градот Компорта, популарна туристичка дестинација, цените се вртоглаво високи. На терасите на рестораните и кафулињата се слуша англиски и шпански.
„Со години, како што сите знаат, ова подрачје станува сè по-туристичко,“ вели 28-годишниот Тијаго Кинташ.
„Луѓето што навистина потекнуваат од тука немаат свое место, бидејќи сè се гради за дојденци, за елитата. Сè е полошо,“ предупредува тој.
Министерството за животна средина исто така најави дека ќе регулира цени на стоки и услуги на плажите, вклучувајќи чадори, вода и кафе.
Почетокот на јули, парламентот ја одби петицијата потпишана од над 10.000 граѓани со барање за посилна заштита на Полуостровот Троја. Но локалните активисти најавија дека ќе продолжат да вршат притисок врз властите.
На 27 јули, движењето Reopen Galé ќе организира протест на плажата Мелидеш за време на Атлантскиот ултрамаратон.
