Американскиот претседател Доналд Трамп наредил портретите на неговите претходници, Барак Обама и Џорџ Буш, да бидат отстранети од местата достапни за посетителите во Белата куќа, објави CNN, повикувајќи се на извори.
Според тие информации, портретот на Обама, кој претходно бил поставен на влезот од зградата, е преместен на врвот од големото скалило што води кон приватната резиденција на претседателот. Тој дел од Белата куќа е затворен за јавноста и е достапен само за претседателското семејство, припадниците на Тајната служба и ограничен круг на персонал. На сличен начин биле преместени и портретите на Џорџ Х. В. Буш и Џорџ В. Буш.
CNN забележува дека овој потег ја отсликува долготрајната напнатост меѓу Трамп и Обама. Сегашниот претседател неодамна го обвини Обама за предавство, тврдејќи дека неговата администрација „измислила“ разузнавачки податоци за руското мешање во американските избори. Во текстот се додава дека Трамп има долготрајни несогласувања и со семејството Буш; иако Џорџ В. Буш и неговата сопруга присуствуваа на инаугурацијата на Трамп, подоцна не учествуваа во официјални настани.
Соговорниците на CNN наведуваат дека Трамп лично ги надгледува сите промени во ентериерот на Белата куќа, вклучително и најситните детали. Местото во големото фоаје каде што претходно се наоѓал портретот на Обама сега го зазема слика која го прикажува обидот за атентат врз Трамп за време на предизборен митинг во Батлер, Пенсилванија.
Според протоколот на Белата куќа, портретите на неодамнешните претседатели обично се поставуваат на истакнати места блиску до влезот, за да можат гостите и туристите да ги видат за време на официјалните настани.
Извор: Политика.рс
