Римејкот на филмот „Пороците на Мајами“ („Miami Vice“) пристигнува во кината во 2027 година, под покровителство на студиото Universal и во режија на Џозеф Косински, авторот на овогодишниот хит „F1“ и блокбастерот „Топ Ган: Маверик“, кој заработи над милијарда долари.
Премиерата на новиот филм е закажана за 6 август 2027.
Како што се наведува, новиот филм ќе ја истражува гламурозната, но и корумпирана сцена во Мајами во средината на 80-тите години. Инспирацијата доаѓа од пилот-епизодата и првата сезона на култната телевизиска серија што изврши големо влијание врз поп-културата, модата и филмската естетика на тоа време.
Филмот ќе биде снимен за IMAX, а кастингот е веќе започнат. Продукцијата треба да почне во текот на 2026 година.
Култната серија и претходните обиди
Оригиналната серија „Miami Vice“ се емитуваше од 1984 до 1989 година на NBC, со Дон Џонсон и Филип Мајкл Томас во улогите на тајни детективи во јужна Флорида.
Ова ќе биде втор филмски римејк, по оној од 2006 година, со Џејми Фокс и Колин Фарел, кој иако звучеше ветувачки, беше комерцијален неуспех – заработи само 165 милиони долари со буџет од 135 милиони.
Искусна екипа зад проектот
Новиот римејк го продуцираат Дилан Кларк („Бетмен“) и Џозеф Косински, а сценариото е дело на Ерик Ворен Сингер и Ден Гилрој, врз основа на ликови создадени од Ентони Јерковиќ, ко-креатор на оригиналната серија, заедно со Мајкл Ман.
Косински зад себе има голем успех со „F1“
Џозеф Косински неодамна го режираше филмот „F1“ за Apple Studios, кој заработи над 620 милиони долари на светско ниво. Во филмот, Бред Пит ја толкува улогата на пензиониран возач на Формула 1 кој се враќа за да му помогне на пропаднат тим. Интензивните сцени со трки се покажаа како огромен хит и го направија овој филм најуспешниот во кариерата на Бред Пит.
