Со ова, вкупната сума што ја има донирано од 2019 година се искачува на импресивни 26,3 милијарди долари, пренесува CNN.
На својата веб-страница Скот напиша дека, иако бројката привлече големо медиумско внимание, „таа е само мал дел од целата грижа и добрина што се споделува во заедниците оваа година“. Нејзините донации во 2024 година изнесуваа 2,6 милијарди долари, а во 2023 година 2,1 милијарда, значително помали во споредба со овогодинешниот рекорд.
Според Forbes, нето-вредноста на Скот изнесува околу 33 милијарди долари, најмногу благодарение на акциите од Amazon што ги доби по разводот со основачот Џеф Безос во 2019 година. Нејзиниот пристап кон филантропијата се издвојува по тоа што организациите не можат да аплицираат за нејзина поддршка. Наместо тоа, тие преку посредници и без претходна најавa добиваат известување дека им е доделена значителна финансиска помош.
Пред нејзината официјална објава, повеќе од десет историски црнечки колеџи и универзитети (HBCU) објавија дека оваа година добиле вкупно 783 милиони долари. Професорката Мерибет Гасман од Универзитетот Ратгерс, која подетално ги следи донациите за овие институции, истакна: „Мекензи Скот е како машина за еднаквост.“
Од 2020 година досега, Скот им има донирано околу 1,35 милијарди долари на HBCU институциите. Дополнително, организацијата UNCF, најголем обезбедувач на стипендии за студенти од малцински заедници – доби 70 милиони долари, а 50 милиони долари доби фондот Native Forward Scholars, кој обезбедува стипендии за студенти од домородните заедници во САД.
Скот не бара извештаи или оправдување за тоа како се трошат средствата. Истражување од 2023 година покажа дека организациите добро управуваат со овие средства и ја користат флексибилноста за да го прошират својот опфат.
Ким Мазука, извршна директорка на непрофитната организација 10,000 Degrees од Калифорнија, опиша дека нивната организација ненадејно добила известување за донација од 42 милиони долари – двојно повеќе од нивниот годишен буџет. „Бев преплавена од радост. Останав без зборови“, изјави Мазука. Средствата ќе им овозможат да поддржат уште повеќе студенти со ниски примања и да основаат сопствен фонд.
Мазука ја пофали Скот за, како што вели, нејзината искреност и насочување кон докажани решенија. Таа објасни дека Скот ги гледа донациите како алатка со која луѓето треба да сфатат дека самите се двигатели на промените.
Оваа идеја потекнува од пророштво на племето Хопи, кое Скот го искористи како наслов на еден од нејзините есеи објавени во октомври.
Дополнително, Скот неодамна инвестираше и во компанија на нејзината поранешна цимерка, која обезбедува студентски кредити, дел од напорот да вложува во иницијативи што се усогласени со мисија, а не само во инструменти што носат финансиски поврат. Во својот есеј таа завршува со порака: „Постојат многу начини да влијаеме на тоа како се движиме низ светот и каде ќе слетаме.“
Извор: Index.hr
