Поранешниот разузнавачки службеник на ЦИА, Ендрју Бустаманте, откри кои би можеле да бидат вистинските причини за интересот на САД кон Гренланд. Бустаманте, кој служел во американските воздухопловни сили и работел со интерконтинентални балистички ракети, денес е водител на подкастот EverydaySpy, каде коментира за политика, глобален конфликт и разузнавање.
Во последните денови, американскиот претседател Доналд Трамп најави можност за воведување царини за Велика Британија и седум европски земји доколку не се дозволи купување на Гренланд од Данска. Трамп истакна дека островот е важен за националната безбедност на САД.
Бустаманте објаснува дека интересот на САД не е само безбедносен. „Американската доминација на Арктикот е клучна за стратегиската позиција на земјата, но Гренланд исто така содржи стратешки и критични минерали кои се важни за економски и воен развој“, рече тој. Според него, глобалното затоплување го отвора пристапот до нови ресурси, што го прави Гренланд економски значаен.
Тој додава дека нема правен основ САД да ја преземат контролата со сила и дека е реално да се постигнат економски договори со локалните власти. „САД можат да се вклучат комерцијално со бизнисите на терен и да го обезбедат пристапот до ресурсите без да го поткопаат НАТО“, истакна Бустаманте.
Според него, позицијата на Гренланд е критична за надзор и системи за предупредување на можни ракетни напади, а островот содржи и природни ресурси како ураниум, железо, минерали од ретки земји, нафта и гас.
Бустаманте заклучува дека конфликтот нема долго да биде во јавноста бидејќи економските и трговските договори веројатно ќе го намалат интересот, а САД ќе продолжат да го потврдуваат својот стратешки интерес во регионот.
