Германското Министерство за одбрана ќе ги суспендира своите кориснички сметки на социјалната мрежа Икс, која во последно време е се почесто критикувана откако ја презеде милијардерот Илон Маск.
Министерството соопшти дека повеќе нема активно да објавува на платформата, освен во „посебни случаи“ како што се одговорите на кампањите за дезинформација.
Одлуката се однесува и на голем број поврзани сметки, како што е германската војска.
„Главната причина за оваа одлука е што објективната размена на аргументи станува сè потешка“, се вели во соопштението.
Оваа одлука доаѓа откако Илон Маск беше домаќин на еден од лидерите на екстремно десничарската Алтернатива за Германија, Алиса Вајдел, на X и изјави дека нејзината партија е „единствената што може да ја спаси Германија“. Тој исто така ги повика Германците да гласаат за неа на претстојните парламентарни избори.
Ќе објавува на WhatsApp, Instagram и YouTube
Министерството за одбрана во иднина ќе го користи каналот WhatsApp за објавување информации за релевантни настани и одлуки на министерот.
Министерството останува присутно и на други мрежи како Инстаграм и Јутјуб, покрај официјалната веб-страница, објави Ројтерс.
Европратениците неодамна ја повикаа Европската комисија да ја испита видливоста на објавите на Х, поранешен Твитер, за да види дали Маск ги фаворизира неговите објави, што би било прекршување на правото на Европската унија.
Милијардерот се зближи со американскиот претседател Доналд Трамп, а критичарите на Х тврдат дека по неговото купување мрежата е преплавена со дезинформации и лажни вести.
