Според информациите од градоначалникот, локалната самоуправа со сите расположливи ресурси е активно присутна на терен. Во интервенциите учествуваат и Територијалната противпожарна единица Кочани, Водостопанство „Брегалница“ и Регионалниот центар за управување со кризи – Кочани. Побарана е и дополнителна материјално-техничка поддршка, особено за испумпување вода од поплавените објекти.
Поради обилните дождови, забележано е значително зголемување на водостојот на реките Брегалница и Кочанска река, а на одредени точки во општините Штип и Чешиново-Облешево дошло и до нивно излевање од коритата.
Последиците од врнежите се видливи и на патната инфраструктура. Утрово се појавиле свлечишта на експресниот пат Радовиш–Штип, како и на патниот правец Злетово – брана Кнежево. Центарот за управување со кризи веднаш го информирал ЈП „Македонија пат“, чи чи екипи излегле на терен и интервенирале соодветно.
Свлечиште е пријавено и во село Липково, на локацијата Кисела Вода. Од Општина Липково информираат дека располагаат со ограничени ресурси за интервенции од ваков тип и, поради сериозноста и ризикот од понатамошно влошување, побарале во санацијата да се вклучат и државните институции.
Надлежните апелираат за внимателност и најавуваат дека состојбата постојано се следи.
