Обилните врнежи што ја зафатија источна Македонија предизвикаа сериозни последици во Кочанската Котлина. Кочанска Река излезе од коритото и поплави делови од селата Чешиново, Облешево и Чифлик, а најголеми штети се пријавени во Облешево, каде под вода се најдоа куќи, економски објекти, магацини со ориз и големи земјоделски површини.
Општина Чешиново–Облешево веднаш активираше кризен штаб. Градоначалникот Јорданчо Костадинов истакна дека општинските екипи се постојано на терен, но дека расположливите ресурси не се доволни за справување со последиците од поплавите.
„Со ограничените капацитети на Јавното комунално претпријатие веќе неколку дена се бориме со проблемите. Излезени сме на терен, но морам јавно да апелирам за помош. Она што го имаме како механизација и човечки ресурси не е доволно да се одговори на оваа криза“, изјави градоначалникот Костадинов.
Мештаните предупредуваат дека причините за поплавите се повторуваат со години — најмногу поради неисчистени канали и запушени одводни системи што не можат да го примат зголеменото количество вода.
Во понеделник ќе биде формирана посебна комисија која ќе изврши процена на штетите, а граѓаните ќе можат официјално да ги пријавуваат последиците од поплавите.
Состојбата ја потврди и директорот на Центарот за управување со кризи (ЦУК), Мухамед Али, кој информираше дека утрото биле поплавени повеќе објекти и приватни дворови.
„Локалната самоуправа е активно ангажирана со сите ресурси. Во интервенциите се вклучени ТППЕ Кочани, Водостопанство ‘Брегалница’ и Регионалниот центар за управување со кризи – Кочани. Побарана е и дополнителна техничка поддршка, особено за испумпување на водата“, изјави Али.
Водостојот на реките Брегалница и Кочанска Река е значително зголемен, а излевање е регистрирано и на територијата на Општина Штип. Силните врнежи предизвикаа и свлечишта — на експресниот пат Радовиш–Штип и на патниот правец Злетово–брана Кнежево. О настаните веднаш е известено ЈП „Македонија пат“, чии екипи излегоа на терен и интервенираа.
Дополнителни проблеми се појавија и во село Липково, кај местото Кисела Вода, каде е регистрирано лизгање на земјиште. Општината Липково соопшти дека нема доволно ресурси за интервенција и побара државна помош за стабилизација на свлечиштето.
Поплавите ги открија хроничните слабости во инфраструктурата, недоволната превенција и недостатокот од редовно чистење на каналите, што години наназад создава сериозен ризик за жителите на Кочанскиот Регион. Локалните власти предупредуваат дека без државна помош и долгорочни системски мерки, ваквите ситуации ќе продолжат да се повторуваат со секој пороен дожд.
