Полска испрати борбени авиони за да пресретне руски извидувачки авион кој летал во близина на нејзиниот воздушен простор над Балтичкото Море, соопштија полските вооружени сили.
Според официјалното соопштение, полските борбени летала го визуелно идентификувале и го придружувале авионот над меѓународните води, сè додека тој не ја напуштил зоната на одговорност на Полска. Инцидентот се случил во утринските часови.
Паралелно со тоа, Полскиот уред за национална безбедност информираше дека во текот на ноќта неколку десетици објекти влегле во полскиот воздушен простор од правец на Белорусија. Од нив, најмалку четири биле идентификувани како веројатни криумчарски балони.
Полските власти оценуваат дека масовноста на овие нарушувања, нивното појавување за време на празничниот период и зголемената активност на руските авиони над Балтикот, како и слични инциденти во Литванија, може да укажуваат на провокација маскирана како криумчарска активност.
Зголемена готовност на источното крило на НАТО
Земјите од источното крило на НАТО се во состојба на зголемена готовност од септември наваму, откако три руски воени авиони го нарушија воздушниот простор на Естонија, а неколку недели подоцна околу дваесет руски дронови влегоа во полскиот воздушен простор.
Криумчарските балони од Белорусија во изминатиот период повеќепати го нарушија воздушниот сообраќај во Литванија, што доведе и до привремено затворање на аеродромот во Вилнус. Литванските власти ги опишаа овие активности како „хибриден напад“, тврдење кое Белорусија го отфрли.
Полската армија соопшти дека дел од воздушниот простор над Подлаското војводство, на североистокот на земјата и долж границата со Белорусија, привремено е затворен за цивилен воздушен сообраќај, од безбедносни причини.
Белоруското и руското дипломатско претставништво во Варшава засега не дадоа коментар за настаните.
