Научниците сè почесто ги преиспитуваат долгогодишните препораки за исхрана со малку масти, а најновите истражувања укажуваат дека одредени полномасни млечни производи може да имаат заштитен ефект врз мозокот.
Истражувачи од Универзитетот во Лунд, Шведска, утврдиле дека луѓето кои редовно консумираат полномасно сирење имаат понизок ризик од развој на деменција поврзана со стареењето. Сличен ефект бил забележан и кај умерена консумација на павлака.
Помал ризик од деменција
Според резултатите од студијата, лицата кои дневно внесувале најмалку 50 грама неприготвено полномасно сирење имале 13 проценти помал ризик од деменција. Кај оние што консумирале 20 грама или повеќе павлака дневно, ризикот бил намален за 16 проценти.
Истражувачкиот тим нагласува дека верзиите со намален процент на масти не го покажале истиот ефект, а не е утврдена значајна поврзаност со други млечни производи како млеко, путер или јогурт.
Што велат научниците?
„Со децении се води дебата дали полномасните производи се штетни, особено кога станува збор за сирењето, кое често се сметаше за храна што треба да се избегнува“, изјави Емили Сонестед, истражувачка и коавторка на студијата, објавена во декември од Американската академија за неврологија.
Како полномасно сирење се смета сирење со најмалку 20 проценти млечна масленост, додека кај павлаката, секоја варијанта под 30 проценти масти се класифицира како нискомасна.
Голема студија, долгорочни податоци
Во анализата биле вклучени речиси 28.000 испитаници од Шведска, чие здравје и исхрана биле следени во период од 25 години. За тоа време, 3.208 лица развиле деменција. Учесниците редовно бележеле што и како јадат, а податоците биле детално анализирани од научниците.
„Нашите резултати покажуваат дека некои полномасни млечни производи може да имаат позитивно влијание врз здравјето на мозокот, што ги доведува во прашање старите претпоставки за мастите“, додава Сонестед.
Важно ограничување
Истражувачите посочуваат дека овие потенцијални придобивки не важат за лицата кои ја носат генетската варијанта APOE e4, позната како фактор на ризик за Алцхајмерова болест. Токму затоа, тие повикуваат на дополнителни истражувања, особено во земји каде сирењето често се консумира во комбинација со преработено месо или поинаку се подготвува.
