Настанот ќе започне во 13:00 часот по локално време, со катафалк што ќе го носи телото на Озборн низ улиците на градот, завршувајќи на симболичната локација – мостот и клупата „Black Sabbath“, кои изминатата недела станаа импровизирано меморијално место за фановите.
Музичка придружба ќе обезбеди локалниот брас бенд Bostin’ Brass, а за оние кои нема да можат да присуствуваат, ќе биде овозможен пренос во живо од камерата поставена кај клупата.
Семејството Озборн се вклучи во покривање на дел од трошоците за организацијата на јавната поворка, додека деталите за приватниот семеен погреб сè уште не се објавени.
Почитта кон Озборн ја изрази и почесниот градоначалник на Бирмингем, Зафар Икбал, кој изјави: „Ози не беше само музичка легенда – тој беше син на Бирмингем. Ни беше важно градот да овозможи достојна и значајна почит пред приватната семејна церемонија. Знаеме колку ова ќе значи за неговите фанови. Горди сме што сме домаќини на оваа проштална поворка во местото каде што сè започна.“
Ози Озборн почина на 22 јули 2025 година, на 76-годишна возраст, само неколку недели по неговиот проштален концерт во Бирмингем. На концертот настапија светски ѕвезди како Metallica и Guns N’ Roses, додека Озборн последен пат се појави на сцена како соло артист и како член на оригиналниот состав на Black Sabbath.
Настанот во среда ќе биде последна можност за фановите да му оддадат почит на „Принцот на темнината“ – токму таму каде што неговата легенда започна.
Извор: The Rolling Stone
