Брендон Блексток, поранешен талент менаџер и сопруг на пејачката Кели Кларксон, почина на 48-годишна возраст по повеќе од три години борба со рак. Според семејството, тој починал мирно, опкружен со најблиските, а јавноста е замолена да ја почитува нивната приватност во овој тежок период.
Веста за неговата смрт дојде само еден ден откако Кларксон објави дека ги одложува преостанатите концерти од нејзината резиденција во Лас Вегас, за да биде со своите деца. „Во овој момент треба да бидам целосно присутна за нив“, напиша таа на Инстаграм.
Кели Кларксон и Блексток се венчаа во 2013 година и имаат две деца – Ривер Роуз (11) и Реми Александар (9). Блексток имаше уште две деца од претходен брак. Нивниот развод беше финализиран во 2022 година, по долга правна битка околу имотот, вклучувајќи го и ранчот во Монтана, кој на крај ѝ припадна на Кларксон.
Во март, Кларксон беше отсутна од своето ток-шоу речиси две недели, а нејзиното отсуство предизвика шпекулации. Подоцна се дозна дека причината била болеста на Блексток, која таа ја држела приватна заради своите деца.
И покрај нивната бурна разделба, загубата на Блексток остави длабока емоционална трага. Кели Кларксон, која во последно време се обидува да одржи баланс меѓу кариерата и мајчинството, сега се соочува со нова фаза – не само како јавна личност, туку и како родител кој ги води своите деца низ процесот на тагување. Обожавателите ѝ изразија поддршка, а нејзиниот тим најави дека концертите ќе продолжат во ноември.
Кели Кларксон, добитничка на „Греми“ и една од највлијателните поп пејачки на својата генерација, во последните години се истакна не само со музика, туку и со искреностa и човечност. Покрај успешната кариера, таа отворено зборува за личните предизвици, мајчинството и менталното здравје, што ја направи уште поблиска до својата публика.
