Во Основниот кривичен суд Скопје денеска почнува судењето против Стојанче Јовановски, кој е обвинет за наведување и помагање во самоубиство на сопругата Ивана од Скопје, која на 2 март годинава почина по пад од балкон заедно со нивната малолетна ќерка.
Според информациите, скопското обвинителство неодамна поднело обвинение против Јовановски, во кое тој се товари за три кривични дела: телесна повреда извршена како продолжено дело на семејно насилство, загрозување на сигурноста и наведување и помагање во самоубиство.
Обвинителството, повикувајќи се на обезбедените докази, тврди дека обвинетиот подолг период нечовечки се однесувал кон сопругата, која била во фактичка и егзистенцијална зависност и подреденост кон него. Според ОЈО Скопје, токму таквото однесување претходело на трагичниот настан од 2 март и, според обвинението, самоубиството може да се припише на небрежност на обвинетиот.
Судењето, како што е наведено, ќе го води судијата Ивица Стефановски.
