Според германскиот „Билд“, сестрите кои стекнаа светска слава во 50-тите и 60-тите години – особено во Германија и Италија – ја донеле одлуката својата животна приказна да ја завршат преку асистирана смрт, постапка што во Германија е дозволена под строго дефинирани услови, меѓу кои и целосна психолошка и правна способност и доброволна согласност.
Родени во 1936 година во Нерхау, Алис и Елен Кеслер оставија длабока трага во европската шоу-бизнис сцена. Нивните настапи, филмски улоги и препознатливата сценска харизма ги направија икони на своето време. Нивната препознатлива физичка појава – за која германските медиуми со децении пишуваат – само дополнително ја зацврсти нивната меѓународна популарност.
Во интервју за „Билд“ во 2024 година, сестрите изразија желба да бидат погребани заедно во една урна, заедно со пепелта од нивната мајка и саканиот домашен миленик.
За својата уметничка кариера и придонес во културата, биле одликувани со Златната роза на Монтре, Сојузниот крст за заслуги, како и со титулата почесни граѓанки на Нерхау. Оваа година го примија и Баварскиот орден за заслуги.
Заминувањето на сестрите Кеслер претставува крај на една ера во европската естрада, а нивното наследство останува длабоко врежано во колективната меморија на неколку генерации.
Извор: N1info.rs
