Роуз Џироне, жената која се сметаше за најстарата преживеана од Холокаустот, почина, соопшти во четвртокот Њујоршката конференција за побарувања (Claims Conference).
Џироне, која е родена во Полска во 1912 година, почина во понеделникот, објави оваа непрофитна организација која обезбедува компензации за преживеаните од Холокаустот, во објава на социјалните мрежи.
Американската телевизиска мрежа CNN извести дека таа починала во старечки дом во Белмор, Њујорк.
„Таа беше силна жена, отпорна. Го извлекуваше најдоброто од ужасните ситуации. Беше многу разумна и практична. Немаше нешто што не можев да ѝ кажам за да ми помогне да го решам – никогаш – од детството па натаму“, изјави нејзината ќерка, Реха Бенникаса.
„Нејзиниот живот беше сведоштво за преживување и сила“, соопшти израелската амбасада во Берлин.
Преживеан сведок на Кристалната ноќ
Џироне е родена во градот Јанов, кој денес се наоѓа во Полска, но во тоа време бил дел од Германија.
Според Њујоршката конференција за побарувања, таа се преселила во германскиот град Бреслау – денешен Вроцлав во Полска – со нејзиниот сопруг Јулиус Манхајм во 1938 година, токму кога нацистите ја спроведувале Кристалната ноќ, погром против Евреите низ цела Германија.
Таа била сведок како нацистите ја палат синагогата и еврејските книги.
Нејзиниот сопруг бил уапсен од нацистите и првично испратен во концентрациониот логор Бухенвалд додека Џироне била осум месеци бремена. Подоцна бил ослободен, а двојката побегнала во Шангај со кинеска виза, пред да се насели во Њујорк во 1947 година.
Таа се развела во 1948 година, а подоцна се омажила за Џек Џироне. Позната како „плеткарска имигрантка“, таа отворила продавници за плетење во САД. Исто така, јавно зборувала за нејзините искуства за време на нацистичкиот период.
Мирјам Боле – најстарата преживеана
Од околу 220.000 преживеани од Холокаустот кои сè уште се живи, околу 14.000 живеат во Њујорк, според податоците на Њујоршката конференција за побарувања.
По смртта на Џироне, се верува дека Мирјам Боле е најстарата жива преживеана од Холокаустот. Холандската Еврејка која живее во Израел ќе наполни 108 години на 20 март.
