Во својата долга кариера, тој остави зад себе богат опус, автор е на над 20 книги поезија, драмски поеми и раскази. Некои од неговите најзначајни дела се: Иселеник на огинот (1965), Нерези (1982), Феникс (1987) и Јас оксиморон (1998). Покрај авторството, се истакна и како преведувач на класици, со што неговиот препев на епот Гилгамеш останува една од најважните книжевни придонеси.
Наградуван повеќекратно за својот творечки опус, Ренџов беше добитник на бројни признанија, меѓу кои и „11 Октомври“, „Браќа Миладиновци“, „Прличев ловоров венец“ и „Рациново признание“.
МИХАИЛ РЕНЏОВ (1936 – 2024)
Различности
Постои различност меѓу дрвјето:
Дрво со седало.
И дрво без седало.
Во седалото се испилува радоста
И влегува во нас
Другото постои заради различност.
Постои разлика меѓу тревите:
Трева со бубалка
И трева без бубалка.
Бубалката брмчи
И ни го населува увото
Другото постои заради различност.
Постои различност меѓу луѓето:
Постои човек со тага
Постои човек без неа.
Човекот без тага си ти
А оној со тага сум јас
а постојам само заради
Различност.
