Во последните три дена во повеќе градови во Црна Гора, граѓаните доброволно вратиле 19 пиштоли, 14 пушки, 496 парчиња муниција, како и повеќе делови од оружје, соопштено е од Управата за полиција на Црна Гора.
Оружјето е вратено во рамки на кампањата која се спроведува веќе подолг период „Почитувај го животот, врати оружје“.
„Апелираме до сите сограѓани да го дадат својот придонес за целокупната безбедност на општеството и да предадат огнено оружје, муниција и експлозивни средства што ги имаат во својот посед, без никаква правна, односно кривична или прекршочна одговорност и без разлика на тоа дали оружјето го поседуваат во илегално или легално сопствеништво“, се наведува во соопштението од Управата за полиција.
Објаснето е дека тоа може да се направи преку повик до полицијата на број 122, или да ги информираат полициските службеници дека сакаат да го вратат оружјето.
„Важно е да напоменеме дека граѓаните не треба самостојно да носат оружје во полициски станици“, истакнуваат од полицијата.
Во пукањето кое се случи на 1. јануари на Цетиње, убиени се 12 лица, меѓу кои три жени и две деца, додека четири лица се повредени. Напаѓачот Ацо Мартиновиќ (45) извршил самоубиство.
По повод трагедијата во Цетиње, во Црна Гора беше прогласена тродневна жалост, на 2, 3. и 4. јануари.
