По повеќе од две години шпекулации, пристигна официјална потврда дека кинескиот автомобилски гигант, BYD, го носи својот ултра-луксузен бренд Yangwang на европскиот пазар. Тоа е најпрестижниот сегмент од понудата на BYD, позициониран дури и над премиум брендот Denza.
Yangwang е создаден со јасна цел – да понуди технолошки напредни и исклучително моќни модели кои директно ќе се натпреваруваат со етаблирани имиња како што се Bentley, Porsche и Ferrari.
Автомобили со неверојатни способности
Брендот Yangwang го привлече вниманието на светската јавност во 2023 година со презентацијата на моделот U8 – луксузен SUV со повеќе од 1000 коњски сили, помоќен дури и од BMW M3. Неговите способности изгледаат речиси нереални: може да се врти 360 степени на место, па дури и е способен да лебди по вода.
Потоа следеше моделот U9, електричен супер автомобил кој достигнува брзина од речиси 390 км/ч. Благодарение на целосно хидрауличната суспензија, U9 може да „скокне“ на место и да вози само на три тркала. И двата модели се достапни во Кина веќе две години, по цени од околу 140.000 и 235.000 евра.
Иако беа прикажани на познатиот Фестивал на брзината во Гудвуд минатата година, BYD до сега беше многу таинствен во врска со своите европски планови.
Официјална потврда и идни модели
Сепак, сега потпретседателката на BYD, Стела Ли, официјално потврди во интервју:
- Нашиот план е да го донесеме Yangwang во Европа.
Ова ќе се случи по лансирањето на брендот Denza, кој е позициониран како конкурент на Audi, а неговото пристигнување на европскиот пазар се очекува на почетокот на следната година. Иако не ги откри сите детали, Стела Ли потврди дека моделите U8 и U9 се планирани за продажба во Европа, а најави и пристигнување на дополнителни модели.
Меѓу нив е и супер-лимузината U7, која ќе се натпреварува со моделот Lotus Emeya. Оваа лимузина има четири електрични мотори и развива импресивни 1.250 КС, со забрзување од 0 до 100 км/ч за само 2,9 секунди.
Со овој потег, BYD станува првиот кинески производител на автомобили што влегува на европскиот пазар на луксузни возила на највисоко ниво.
Сепак, останува нејасно дали ќе се обиде да ги позиционира цените под конкурентите како што се Bentley Bentayga и Ferrari 296, или поради трошоците за прилагодување кон европските стандарди и увоз, со царина од 17 проценти за кинеските електрични автомобили, цените ќе бидат значително повисоки отколку во Кина.
