По големиот пожар: Кина започнува контрола на сите високи згради

Кина нареди сеопфатни инспекции на сите високи згради по големиот пожар. Контролите ќе откриваат пожароопасни материјали, неисправна опрема и ризични градежни работи

Комитетот за безбедност при работа на Државниот совет на Кина нареди спроведување сеопфатни инспекции на високите згради низ целата земја, со цел да се идентификуваат и отстранат потенцијалните пожароопасности.

Како што соопшти кинеското Министерство за вонредни ситуации, инспекциите ќе ги опфатат станбените и јавните објекти, вклучувајќи деловни згради, болници и трговски комплекси, пренесе Синхуа.

Посебно внимание ќе биде насочено кон објектите кои во моментов се во процес на надворешно реновирање или внатрешни градежни работи.

Контролите ќе утврдуваат дали во изолацијата на надворешните ѕидови се користат запаливи материјали, дали се присутни забранети материјали — како дрвени скелиња и незаштитени мрежи — и дали противпожарната опрема функционира исправно, вклучувајќи хидрантски системи, автоматски прскалки и системи за алармирање.

Сите региони се задолжени да организираат самоинспекции во институциите и претпријатијата, додека надлежните органи ќе спроведуваат и случајни контроли. Министерството истакна дека сите утврдени ризици мора итно да се отстранат.

е-Трн да боцка во твојот инбокс

Последни колумни