DEHP е дел од групата фталати – хемикалии кои ја прават пластиката флексибилна. Тие се присутни во секојдневните производи како пакување за храна, козметика, цевки, детергенти и средства против инсекти. Овие хемикалии влегуваат во телото преку голтање или вдишување на микрочестички, а истражувањата ги поврзуваат со дебелина, дијабетес, проблеми со плодноста, па дури и со некои видови рак.
Најновата анализа на американски научници од NYU покажа дека DEHP може да предизвика хронично воспаление на крвните садови, што со текот на времето го зголемува ризикот од срцев удар и мозочен удар. Само во 2018 година, кај луѓето на возраст од 55 до 64 години, оваа хемикалија придонела за повеќе од 13 проценти од смртните случаи поврзани со срцеви заболувања.
Најголем број смртни случаи се регистрирани во Индија, Кина и Индонезија – земји кои доживуваат нагло зголемување на производството на пластика, но без построги регулативи како на Запад. Иако регулативите во Европа се построги отколку во многу азиски земји, фталатите како DEHP сè уште се користат во разни производи, особено во пластика за пакување храна, медицинска опрема (како што се кеси за инфузија и катетри), како и во козметика и играчки.
Европската агенција за хемикалии (ECHA) веќе го класифицираше DEHP како „супстанца што предизвикува загриженост“ поради неговото потенцијално влијание врз плодноста и развојот на детето, но сè уште не е воведена целосна забрана за неговата употреба во сите области.
Економскиот аспект исто така не е за занемарување. Трошоците од изложеност на DEHP се проценуваат на најмалку 510 милијарди долари годишно, а можеби и на неколку трилиони долари.
Научниците предупредуваат дека е потребен итен глобален одговор – намалување на употребата на овие хемикалии и построга контрола на нивната примена. Следниот чекор ќе биде да се испита како намалувањето на изложеноста на фталати може да ја намали смртноста, како и други здравствени проблеми, како што е предвременото породување.
