Истражувачите сакале да видат дали времето од денот кога луѓето пијат кафе влијае на нивното здравје.
Тие проучувале повеќе од 40.000 возрасни лица во САД како дел од долгорочни студии кои се занимаваат со здравје, исхрана и начин на живот.
Откриле два различни шеми на пиење кафе: оние кои пијат кафе наутро и оние кои го пијат во текот на денот.
Повеќе од една третина (36 проценти) од учесниците пиеле кафе наутро, а 14 проценти од нив во текот на денот.
Тим на истражувачи предводени од експерти од Универзитетот Тулејн во САД ги набљудувале учесниците речиси десет години.
За време на следењето, 4.295 учесници починале.
Земајќи ги предвид различните фактори, истражувачите откриле дека луѓето кои пијат кафе наутро имаат 16 отсто помали шанси да умрат од оние кои воопшто не пиеле кафе.
Тие, исто така, имале 31 отсто помали шанси да умрат од срцеви заболувања.
За луѓето кои пиеле кафе во текот на денот, немало намалување на ризикот во споредба со оние кои не пијат кафе.
„Пиењето кафе наутро може да биде посилно поврзано со помал ризик од смртност отколку пиењето кафе подоцна во текот на денот“, напишаа истражувачите во European Heart Journal.
Водечкиот автор на студијата Лу Чи од Универзитетот Тулејн изјави: Тековното истражување сугерира дека пиењето кафе не го зголемува ризикот од болести на срцето и крвните садови и се чини дека го намалува ризикот од некои хронични болести како што е дијабетес тип 2.
„Имајќи ги предвид ефектите што кофеинот ги има врз нашите тела, сакавме да видиме дали времето од денот кога пиете кафе влијае на здравјето на срцето“, рече тој.
„Нашите наоди укажуваат дека не е важно само дали пиете кафе и колку, туку и времето од денот кога го пиете. Како по правило, во препораките за исхрана не даваме совети за тајмингот, но можеби треба да размислиме за тоа во иднина“, додаде тој.
Тој нагласи дека ова истражување не открива зошто пиењето кафе го намалува ризикот од смрт од кардиоваскуларни болести.
Можно објаснување е дека консумирањето кафе во попладневните часови може да го наруши деноноќниот ритам и нивото на хормони како што е мелатонин. Ова пак води до промени во кардиоваскуларните ризик фактори како што се воспалението и крвниот притисок.
