Петта година по ред, врвот на Водно беше домаќин на незаборавна новогодишна журка, организирана од планинарскиот дом „Даре Џамбаз“. Оваа година, благодарение на топлото време, температурите над нулата и прекрасното зимско сонце, се собра рекорден број посетители – над 1.000 луѓе уживаа во позитивната енергија, добрата музика и пријатната дружба.
За одличната атмосфера се погрижи диџеј Мац со својот енергичен сет, кој ја одржуваше журката во полн ек. Присутните, од планинари кои стигнаа пешки, до цели семејства со мали деца и домашни миленици, се разлеаја низ врвот, уживајќи во добрата енергија, греаното вино и специјалитетите што некои од друштвата ги донесоа со себе. Некои посетители си организираа вистински празнични трпези, правејќи од оваа журка уште повпечатлив настан.
Редиците за жичарницата сведочеа за ентузијазмот на посетителите – се чекаше повеќе од половина час за возење, но тоа не ја намали насмевката на лицата. Организаторите изјавија дека ваквата масовност е резултат на совршената комбинација на времето и расположението на луѓето.
Најавено е дека на Бадник ќе следи уште една традиционална дружба на врвот на Водно, со кршење лепче и уживање во утринските часови. За сите кои сакаат добар почеток на денот и празнично дружење, повикот е јасен: се гледаме на Водно!
Во продолжение, погледнете дел од фотографиите и видеата кои ја доловуваат атмосферата од овој незаборавен ден.
