Случајот се однесува на драматичните настани од крајот на 2022 година, кога Кастиљо неуспешно се обиде да го распушти Конгресот и да преземе проширени извршни овластувања.
Пресудата доаѓа само еден ден откако друг поранешен перуански лидер, Мартин Визкарра, беше осуден на 14 години затвор поради примање мито во периодот пред неговото доаѓање на функцијата — што уште еднаш ја потврдува длабоката и долготрајна политичка криза што ја потресува земјата.
Неуспешен обид за распуштање на Конгресот
Во декември 2022 година, Кастиљо преку телевизиски настап објави дека го распушта Конгресот и дека формира „вонредна влада“. Но неговата акција пропадна речиси инстантно — парламентот експресно го разреши, полицијата го приведе, а земјата се соочи со масовни протести кои траеја со недели.
Во насилните судири со полицијата загинаа десетици луѓе, најмногу во сиромашните региони каде што Кастиљо уживаше силна поддршка. На судењето, тој ги негираше обвиненијата и тврдеше дека „само прочитал документ без последици“, но обвинителството го обвини за свесен обид за државен удар и побара максимална казна од 34 години затвор.
Политичка нестабилност без преседан
Кастиљо со оваа пресуда се приклучува на долгата листа поранешни перуански лидери кои завршиле зад решетки. Перу веќе со години се соочува со сериозна политичка нестабилност: од 2018 година земјата смени шест претседатели поради импичмент, оставки или корупциски скандали, што е малку видено дури и во регион со чести политички превирања.
По неговото разрешување, функцијата ја презеде потпретседателката Дина Болуарте. Но и таа беше симната на почетокот на октомври оваа година, откако Конгресот ја прогласи „морално неспособна“ за вршење на функцијата. Наследник на Болуарте е Жозе Јери, кој треба да го доврши актуелниот мандат до јули 2026 година.
Претседателските избори во Перу се распишани за април следната година, но аналитичарите предупредуваат дека, со оглед на политичките потреси, стабилноста и понатаму останува неизвесна.
Извор: Index.hr
