Вулканот Килауеа, кој се наоѓа на Големиот остров на Хаваи и важи за еден од најактивните вулкани во светот, повторно еруптираше – по 25-ти пат од декември минатата година.
Најновата ерупција започна во средата, кога лавата почна да излегува од северниот отвор на вулканот, исфрлајќи врел материјал повеќе од 100 метри во височина.
Научниците од Хавајската вулканска опсерваторија при Американскиот геолошки институт (USGS) соопштија дека постои можност лавата да достигне уште поголема висина во наредните денови, поради засилени гасови и зголемен подземен притисок.
„Еве нè пак!“, објавија од опсерваторијата на нивната официјална Facebook страница, потврдувајќи дека активноста на вулканот продолжува речиси без прекин цела година.
Што ја предизвика ерупцијата?
Според извештајот на опсерваторијата, пред ерупцијата се случило натрупување на гас во центарот на лавиниот столб. Процесот вклучува: акумулација на гас под површината на лавата, подигање на лавата поради притисок и потоа нагло ослободување, што доведува до експлозивно прскање и повратно слевање во отворот,
Што е “вог” и зошто е опасен?
USGS издаде предупредување за високи нивоа на вулкански гасови, особено сулфур-диоксид. Кога овој гас ќе реагира во атмосферата, создава густа маглива наслага позната како вог (вулкански смог).
Иако ерупцијата засега не претставува директна закана за населените места, експертите внимателно ја следат ситуацијата.
