Стапката на писменост меѓу возрасните лица е намалена во земјите на Европската унија (ЕУ) во последните десет години, јавува Анадолија. Комисијата на ЕУ објави резултати од Меѓународното истражување на вештини на возрасни лица (PIAAC), кое беше кофинансирано со Организацијата за економска соработка и развој (OECD).
Резултатите од истражувањето спроведено во 20 земји-членки на ЕУ, како и во Јапонија, Норвешка, Велика Британија, Канада, Швајцарија, Нов Зеланд, САД, Сингапур, Јужна Кореја и Израел, откриле дека писменоста и математичките вештини на возрасните во овие земји се намалиле или стагнирале во последните десет години.
Според анкетата за возрасни лица од 16 до 65 години, ситуацијата значително се подобрила во Финска и Данска, додека покрај овие две земји, напредок во бројчани вештини е забележан во Естонија и Холандија.
Истражувањето исто така покажало дека нееднаквоста на вештините помеѓу возрасните со најслаби и најдобри резултати се зголемила, особено во писменоста.
Пад на писменоста
Кога се разгледуваат земјите вклучени во истражувањето генерално, забележано е дека земјите кои покажале напредни вештини во двете области биле Финска, Јапонија, Холандија, Норвешка и Шведска.
Меѓу земјите на ЕУ, најниски резултати во писменоста се забележани во Полска, Литванија, Чешка, Унгарија и Австрија. Следуваат Франција, Италија, Ирска, Шпанија и Холандија, со поумерен пад.
Негативни резултати имало и во математичките способности во Литванија, Полска, Унгарија и Словачка.
Меѓу земјите надвор од ЕУ, најголем пад на писменоста е забележан во Кореја, на Нов Зеланд и во САД.
