Папа Франциск (88) има почеток на обострана пневмонија и „сложена” клиничка слика, објави Ватикан во новиот медицински билтен, петти ден по неговата хоспитализација.
Снимка на градниот кош покажала почеток на обострана пневмонија, што бара дополнително лекување со лекови. Ватикан додаде дека Папата, и покрај тоа, е во добро расположение.
“Лабораториски тестови, рендгенски снимки на градниот кош и клиничката состојба на Светиот Отец продолжуваат да претставуваат сложена слика”, се наведува во соопштението.
Папата е хоспитализиран во болницата Џемели во Рим од петокот, најпрво поради бронхитис, а неговите обврски се откажани до крајот на викендот. Тој се бори со респираторна инфекција веќе повеќе од недела дена, а на 14 февруари беше примен во болницата. Докторите потврдија дека Папа Франџа е посебно подложен на белодробни инфекции, бидејќи како млад боледувал од плеуритис, поради што му е отстранет дел од белодробното крило.
Заменик од Ватикан, кој сакал да остане анонимен, изјавил дека Папата не е ставен на респиратор и дека самостојно дише.
Папа Франциск нема да учествува во настаните поврзани со католичката Света година кои се закажани за следниот викенд. Јавната папска аудијенција која требаше да се одржи во сабота е откажана поради лошото здравје на Папата, а неделната миса ќе ја предводи друг висок официјален претставник на Ватикан.
