Свесно

Пад на европските берзи по воведувањето на царините од Трамп

На европските берзи утринава индексите забележаа остар пад, бидејќи инвеститорите стравуваат од трговска војна по одлуката на Вашингтон да воведе царини на увозот од Канада и Мексико.

04/03/2025
10:16

Индексот STOXX 600, кој ги следи водечките европски акции, во 9:30 часот беше во минус од 1%, откако претходно достигна рекордно ниво.

Лондонскиот FTSE индекс падна за 0,55%, на 8.825 поени, додека франкфуртскиот DAX се намали за 1,62%, на 22.755 поени, а парискиот CAC изгуби 1,14%, спуштајќи се на 8.106 поени.

Сличен тренд се забележуваше и на азиските берзи – MSCI индексот на азиските акции во 9:30 часот беше во минус од 0,3%. Јапонскиот Nikkei падна за 1,2%, а индексите во Јужна Кореја, Хонг Конг и Австралија бележеа пад од 0,1% до 0,6%. Единствено во Шангај се забележа благ раст.

САД воведоа царини, Канада и Кина возвратија

Инвеститорите се загрижени бидејќи американскиот претседател Доналд Трамп вчера воведе царини од 25% на увозот од Канада и Мексико.

Првично, оваа одлука беше најавена уште во јануари, но беше одложена за еден месец за да им се даде време на властите во соседните држави да преземат мерки против шверцот на дрога и нелегалната имиграција.

Канада веднаш реагираше – премиерот Џастин Трудо објави дека стапуваат на сила реципрочни царини од 25% за американски увоз вреден 20 милијарди долари. Доколку САД не ги укинат царините во наредните 20 дена, Канада ќе воведе нови царини од 25% за дополнителен американски увоз вреден над 80 милијарди долари.

Од Мексико најавија дека во вторник ќе ги објават своите контрамерки.

Освен тоа, денеска на сила стапуваат и дополнителни царини од 10% на кинески производи во САД, со што вкупната царинска стапка за одредени кинески стоки ќе достигне 20%.

Кина најави одговор со зголемување на царините за 10-15% на повеќе американски земјоделски и прехранбени производи, како и ограничување на извозот и инвестициите за 25 американски компании.