Во соопштение до јавноста, неговото семејство изјави:
„Со тага што не може да се искаже со зборови, мораме да соопштиме дека нашиот сакан Ози Озборн почина утринава. Беше опкружен со семејството и со љубов.“
Концертот што се одржа пред нешто помалку од три недели, беше емотивно збогување со фановите, каде Озборн настапи седејќи на трон.
„Немате поим како се чувствувам – благодарам од дното на срцето,“ им се обрати тој на присутните.
Прошталниот настап беше организиран со поддршка од негови омилени музички имиња, меѓу кои Metallica и Guns N’ Roses, а беше најавен како „последниот поклон“ од 76-годишната рок икона.
Ози Озборн ја започна својата кариера како фронтмен на Black Sabbath, група која ја постави основата на хеви металот, а подоцна постигна огромен успех и како соло артист. Песните како „Iron Man“, „Paranoid“, „War Pigs“, „Crazy Train“ и „Changes“ станаа дел од рок антиката.
Во 2000-тите стекна нова популарност преку реалното шоу „The Osbournes“ на MTV, кое го прикажуваше неговиот несекојдневен семеен живот во Лос Анџелес со сопругата Шерон и нивните деца Кели и Џек.
Озборн беше познат и по своето бурно сценско поведение и скандалозни анегдоти, како на пример приказната дека на сцена одгризал глава од лилјак.
Во последните години се бореше со Паркинсонова болест и други здравствени компликации, вклучително и сериозни повреди од пад во 2019 година. И покрај тоа, во 2022 година приреди изненадувачки настап на затворањето на Игрите на Комонвелтот во Бирмингем.
Концертот во Вила Парк го најави неговата сопруга Шерон, истакнувајќи дека Ози е решен на фановите да им подари „совршено проштавање“.
Озборн беше двапати приман во Рокенрол Куќата на славните – како член на Black Sabbath и како соло артист. Освои пет Греми награди од вкупно 12 номинации, доби ѕвезда на Холивудската патека на славните, како и на улицата Broad Street во Бирмингем. Меѓу бројните признанија се и наградата Godlike Genius од NME, како и титулата Living Legend од Classic Rock.
Извор:News.sky
