Претседателот Доналд Трамп зборува за „огромен напредок“ на неговиот тим, додека државниот секретар Марко Рубио ги оцени американско-украинските разговори во Женева како „многу позитивни“, истакнувајќи дека преостанатите прашања „не се непремостливи“.
Паралелно, по средбата меѓу американски и руски претставници во Абу Даби, Вашингтон соопшти дека „Украинците се согласиле со мировниот договор“, иако постојат „неколку помали детали“ што допрва треба да се усогласат, пренесува CNN.
Сепак, според висок извор од Киев со директен увид во преговорите, оптимистичката слика што ја прикажува администрацијата на Трамп не ја отсликува целосно реалноста. Иако, како што вели изворот, е постигнат „кредибилен консензус“ за голем дел од точките од американскиот предлог, остануваат најмалку три области во кои разликите се длабоки – разлики што потенцијално можат да го загрозат целиот мировен процес.
1. Територијалното прашање во Донбас
Најчувствителната точка е можноста Украина да се откаже од дел од клучните територии во Донбас – регион што Русија го анектираше, но сè уште не го контролира целосно. Станува збор за „појас на тврдини“, серија силно утврдени градови од огромно значење за украинската безбедност.
Претходните американски предлози предвидуваа оваа зона да стане демилитаризирана територија под руска управа. Изворот за CNN посочува дека има „извесен напредок“, но додава дека конечна одлука нема.
„Би било погрешно да се каже дека имаме верзија која Украина ја прифатила“, истакнува изворот.
2. Ограничување на украинската армија
Второто спорно прашање е предложеното американско ограничување на големината на украинските вооружени сили на 600.000 војници. Од Киев потврдуваат дека се разговара за поголема бројка, но дека Украина сè уште бара дополнителни измени пред да се согласи на какво било ограничување на сопствената одбрана.
3. Членството во НАТО – најцврстата „црвена линија“
Најчувствителниот услов за Украина останува барањето да се откаже од амбициите за приклучување кон НАТО – барање што Киев го смета за целосно неприфатливо. Според украинскиот извор, таков компромис би создадыл „опасен преседан“ и практично би ѝ дал на Русија право на вето врз одлуките на алијансата „во која дури и не е членка“.
Овие три прашања – територијално откажување, демилитаризација и трајно одрекување од НАТО – се токму причините што Кремљ ги наведуваше како мотив за започнување на војната. Позитивно решавање во корист на Москва претставува клучен услов за Русија да стави крај на конфликтот.
За Украина, пак, тие се болни и тешки „црвени линии“, за кои се бореа и загинаа десетици илјади украински војници. Формално откажување од кој било од овие принципи би претставувало огромен политички товар за претседателот Володимир Зеленски и неговото раководство.
Затоа, заклучува CNN, иако во Вашингтон тоа се претставува како „неколку преостанати детали“, станува збор за суштински несогласувања кои и понатаму ја одредуваат иднината на мировниот процес.
Извор: Index.hr
