Пазарот на електрични возила доживува светска експанзија. Се проценува дека до 2030 година ќе достигне вредност од неколку милијарди долари. Производителите сè повеќе ги охрабруваат клиентите да се одлучат за електрично возило, а објавуваат и листи на нивните најприфатливи модели.
Пазарот на електрични возила (EV) во Африка доживува исклучително брз раст. Според податоците објавени од CNN International, се проценува дека до 2030 година ќе достигне вредност од 4,2 милијарди долари, што е повеќе од двојно од сегашната вредност.
Сепак, повеќето електрични возила сè уште зависат од електричната мрежа, која често се напојува со комбинација од обновливи и фосилни извори на енергија.
Тунисскиот стартап Bako Motors се придружи на тој тренд, но со уникатен пристап, потпирајќи се на еден од најголемите природни ресурси во Африка, а тоа е сончевата енергија. Нивните компактни автомобили и камиони се опремени со соларни панели на покривот. Иако возилата сè уште користат литиум-јонски батерии, кои можат да се полнат дома или на одредени јавни места, соларните панели овозможуваат дополнително полнење преку бесплатна сончева енергија. Компанијата досега произведе 100 возила, но планира значително да го зголеми производството и извозот во наредната година.
„Соларните ќелии ни обезбедуваат повеќе од 50% од нашите енергетски потреби. На пример, нашиот модел Б-Ван, наменет за комерцијална употреба, може да патува околу 50 километри дневно користејќи само бесплатна енергија од сонцето. Тоа се околу 17.000 километри годишно, што претставува огромна заштеда основач и извршен директор на Бако Моторс“, рече Бубакер Сијала.
Прифатливи модели за локални потреби
Компанијата, основана во 2021 година, започна со производство со товарни трицикли, но во меѓувреме се преориентира на четирицикли. Во понудата има два главни модели.
Првиот е Б-Ван, дизајниран за логистички потреби. Може да носи до 400 килограми товар, има дострел од 100 до 300 километри, а почетната цена е 24.990 туниски динари (околу 7.900 евра).
Вториот модел е Bee, мал градски двосед, идеален за секојдневно возење низ градот. Неговиот дострел е помеѓу 70 и 120 километри, а максималната брзина е 45 км/ч. Почетната цена е 18.264 туниски динари (околу 5.800 евра).
Халед Хабајеб, директор за операции на Bako Motors, открива дека компанијата моментално развива трет модел, X-Van, кој ќе има две седишта и поголем товарен простор.
Хабајеб нагласува дека повеќе од 40% од деловите за секое возило се набавуваат локално, вклучувајќи литиум-железо-фосфатни батерии и челик, што придонесува за создавање на многу потребни работни места во Тунис.
