OpenAI, креаторот на ChatGPT, разви алатка што ќе става воден печат на текст генериран од вештачка интелигенција за да се усогласи со Законот за вештачка интелигенција (ВИ), но компанијата сè уште не ја објавила, наводно од страв да не ги изгуби корисниците.
Законот на ЕУ за вештачка интелигенција бара алатките за вештачка интелигенција, како што е ChatGPT, кои генерираат аудио, слика, видео или текстуална содржина, да бидат видливо означени како вештачки генерирани или манипулирани.
Законот стапи на сила на 1 август, но овој услов ќе се применува од 2 август 2026 година.
„Волстрит џурнал“ (WSJ) цитираше извори кои велат дека OpenAI е подготвен да имплементира алатка за воден печат на текст веќе една година, но се двоуми да го стори тоа од страв да не ги изгуби корисниците.
Во ажурирана блог објава во неделата, OpenAI потврди дека развил „високо прецизна“ алатка за воден печат на текст што „ќе продолжи да ја разгледува додека истражува алтернативи“.
Сепак, компанијата соопшти дека во моментов ги проценуваат ризиците од таква алатка, на пример, „нашето истражување сугерира дека методот на воден печат на текст има потенцијал непропорционално да влијае на некои групи“, како што се оние чиј мајчин јазик не е англискиот.
Според WSJ, OpenAI дебатира и спроведува анкети од ноември 2022 година за да одлучи дали да имплементира алатка за воден печат.
Во една анкета, речиси 30 проценти од лојалните корисници на ChatGPT изјавиле дека би го користеле четботот помалку доколку OpenAI постави водени жигови, а конкурентот не го стори тоа. Сепак, друга анкета спроведена од OpenAI покажа дека, апстрактно, четири од пет луѓе ширум светот ја поддржуваат идејата за алатки за откривање на вештачка интелигенција.
Воден печат како алатка
Алатката дигитално би ја означувала секоја содржина креирана од ChatGPT, отежнувајќи им на луѓето да злоупотребуваат содржина генерирана од вештачка интелигенција или да ја користат за измама. Злоупотребата на таква содржина предизвика големи проблеми за работодавците, наставниците и професорите, кои бараа начини да ја ограничат употребата.
WSJ објави дека алатката за воден печат не остава видливи траги во пишаниот текст, но кога тој текст се проверува со алатка за детекција на вештачка интелигенција, тој се означува како содржина генерирана од вештачка интелигенција.
Сегашните алатки за детекција на вештачка интелигенција се донекаде несигурни и можат да дадат мешани резултати, што им отежнува на едукаторите и професионалците да ја означуваат содржината генерирана од вештачка интелигенција.
Водениот печат е споменат во нацрт-Договорот за вештачка интелигенција, збир на доброволни обврски на кои компаниите можат да се потпишат за да се подготват за усогласување со Законот за вештачка интелигенција. Комисијата се надева дека ќе одржи настан за потпишување ветувања во септември, каде што компаниите јавно ќе се обврзат на договорот.
