Кога јадеме во ресторани, особено во оние поскапи или помалку познати, сите посакуваме пријатно искуство. Но квалитетот на храната и свежината на состојките не се само прашање на вкус – туку и прашање на здравје. Иако менито може да изгледа примамливо, зад некои јадења може да се кријат сериозни ризици: застарени намирници, неправилно складирање или несоодветна подготовка може да го расипат оброкот и да го загрозат желудникот.
Професионалните готвачи често забележуваат работи што просечниот гостин не ги гледа и точно знаат кои јадења од менито е подобро да се избегнуваат. Нивните совети можат да спречат оброкот да се претвори во непријатно здравствено искуство.
Дин Харпер, готвач во Harper Fine Dining, го споделува своето искуство:
„Ако сте во ресторан со пониски цени, лично би избегнувал туна ролати. Тоа може да биде ризично. Подобро одберете нешто зготвено или со помал ризик. Така ќе уживате повеќе и ќе избегнете непријатни изненадувања.“
Меѓу готвачите владее согласност дека суровата риба, како што се туна ролати или суши, особено во ресторани каде што се штеди на квалитет или складирање, може да биде најголем проблем. Свежината е клучна, а расипана риба може да предизвика сериозни стомачни тегоби, па дури и труење. Дин советува секогаш да прашате кога рибата е испорачана и како се чува.
Сличен став има и Марк МекШејн, готвач и основач на Food Hygiene Certificate:
„Никогаш не нарачувам дагњи во понеделник. Во многу ресторани, морските плодови се доставуваат во петок, што значи дека до понеделник веќе стојат два дена. Освен ако нема свежа испорака преку викенд, не би ризикувал со нивната свежина.“
Марк додава дека кај морските плодови, посебно важно е да се обрне внимание на мирисот и изгледот. Гостите често мислат дека сè е „свежо“, но дури и мала промена во мирисот или нежно отворените школки се знак за тревога.
Според него, свежите дагњи имаат цврсто затворени школки што се затвораат при лесен удар. Треба да мирисаат на чисто море и да се чуваат на мраз или во проветрена посуда, никогаш во вода. Сѐ што отстапува од ова – е предупредување.
„Зафатени ресторани кои ги обележуваат датумите на испорака и можат да потврдат дека сè е свежо доставено во недела или понеделник – се за доверба. Во помалите ресторани, побезбедно е да се јаде од средината на неделата, кога обично има нова испорака. Ако се двоумите, не ризикувајте – вратете ги дагњите со напукнати школки, непријатен мирис или оние што не се отвораат по варење. Професионална кујна нема да се расправа за тоа“, вели Марк.
Покрај морските плодови, готвачите советуваат претпазливост и со јадења што содржат млади сирења, јајца и сурово месо, особено во ресторани со пониски цени. Тие може да изгледаат примамливо, но ако состојките подолго стоеле или биле неправилно складирани – можат да бидат „бомба“ за желудникот.
