На Бернските Алпи во Швајцарија штотуку е отворена најстрмната жичарница во светот. Поврзувајќи го селото Штехелберг во долината со градот Мирен, жичарницата има наклон од 159,4 проценти.
Патувањето трае само четири минути, при што жичарницата совладува разлика во висина од 775 метри на патека долга речиси 1.194 метри.
Две кабини висат на рака долга 11 метри со цел да се надмине стрмната падина, а секоја може да прими до 85 патници. Маршрутата е целосно автономна и постојано е надгледувана од камери и сензори, што и овозможува да функционира без екипаж во кабините.
Првата кабина го започна своето патување со жичарницата во петок, на 13 декември, за време на официјалната церемонија на отворање. Во саботата на 14 декември почна да прима редовни патници.
Новата жичарница е дел од проектот „Schilthornbahn 20XX“, кој подразбира изградба на нова траса составена од три делници. На крајот ќе ги поврзе Штехелберг и Мирен преку Бирг до Шилторн, скратувајќи го тековното време на патување од 32 минути на околу 18 минути.
Џејмс Бонд ја прослави „Пиз Глорија“
Швајцарскиот планински ресторан „Пиз Глорија“ стана познат благодарение на филмот за Џејмс Бонд од 1969 година „На услугата на нејзиното височество“.
Овој ротирачки ресторан се наоѓа на врвот на планината Шилторн и нуди панорамски поглед од 360 степени на повеќе од 200 планински врвови. Ако видливоста е добра, можете дури и да го видите Мон Блан.
Дизајниран од бернскиот архитект Конрад Волф, овој ресторан тврди дека е првиот револвинг ресторан во светот.
Името на ресторанот доаѓа од истоимениот роман на Иан Флеминг од 1963 година, во кој тој е скривалиштето на планинскиот врв на негативецот Ернст Ставро Блофелд. Продуцентскиот тим на филмот најде делумно изграден ресторан и придонесе за завршување на неговата изградба во замена за ексклузивна употреба за снимањето на филмот од 1969 година.
Во исто време со најстрмната жичарница во светот беше отворена и новата жичарница меѓу Мирен и Бирг. Завршниот дел од трасата од Бирг до Шилторн се очекува да биде отворен во март 2025 година, додека финализирањето на целиот проект е планирано за пролет/лето 2026 година. Овој завршен дел од трасата е затворен од средината на октомври поради работа на проектот.
