УМПАКИ Скопје, во рамките на проектот Moving Classics: Sonic Bridges (MCSB), финансиран од програмата Creative Europe, објавува повик за истражувачи, писатели, поети, текстописци, драматурзи и либретисти кои живеат и творат во нашата земја. Станува збор за платена можност за престој во Ирска каде учесниците ќе ја истражуваат темата на јазичната припадност како дел од идентитетот.
Ова е можност за учесниците да создадат говорен или отпеан текст за филм во времетраење од 10-13 минути во соработка со режисер и композитор од Ирска. Проектот ќе создаде серија од 10 хибридни звучни и визуелни уметнички филмови и инсталации, кои ќе ги поврзат музичарите, писателите, визуелните раскажувачи и локалните заедници низ Европа. Филмовите ќе бидат прикажани на настани организирани од партнерските организации и во рамките на фестивалски мрежи.
Апликантите треба да достават наратив или писмен дел од краток филм во траење од 10-13 минути. Се охрабрува користење на лични и архивски материјали за да се истражи како јазикот влијае на создавањето и рушењето на заедниците. Апликантите треба да достават линкови до материјали кои го претставуваат нивното претходно искуство, кратка биографија како и мотивациско писмо со опис на претходни проекти и интересот на апликантот за пријавување во проектот.
Избраните учесници ќе имаат можност да престојуваат во Ирска во два наврати, во 2025 и 2026 година. Датумите ќе бидат договорени по изборот на учесниците. Филмовите ќе бидат финализирани до пролетта 2027 година. Учесниците ќе добијат хонорар од 3.000 евра, патни трошоци и сместување, како и буџет за продукција.
Крајниот рок за поднесување на апликациите е 27 јули 2025 година, до 12:00 часот. За повеќе информации и апликацијата, посетете го следниот линк:
https://airtable.com/appMDM6P7uP838ev3/pagEOVXbciJ5AVu8W/form
Проектот Moving Classics: Sonic Bridges (MCSB) е креативно инспириран од темата на Скопје 2028: „Култура над разновидноста“. Работејќи со лични сведоштва, оригинална музика и аудиовизуелни/филмски инсталации, проектот ќе поврзе писатели, музичари и аудиовизуелни/филмски уметници со продукциски тимови за да ја истражат современата европска идентитетска динамика на периферијата на континентот. Проектот ќе создаде 10 хибридни звучни и визуелни доживувања (уметнички филмови, проекции) преку кои музичари и уметници од сите краеви на Европа ќе соработуваат со етнографи, визуелни раскажувачи и локални заедници, заедно со партнерите и нивните креативни тимови.
Филмовите ќе бидат објавени од страна на креативни и културни организации и прикажани на настани на партнерските организации како и во рамки на фестивалските мрежи на проектот. Партнерска организација од нашата земја е Унијата на македонски професионални организации во креативните индустрии УМПАКИ Скопје.
