Директорот на SFF, Јован Марјановиќ, истакна дека фестивалот е многу повеќе од прослава на филмот. „Живееме во свет во кој конфликтите, најтешките злосторства и политичките кризи се дел од секојдневието. Во такви времиња, филмот мора да зборува, не може и не смее да молчи“, рече тој. Марјановиќ ги повика институциите да придонесат кон стабилност и развој на босанската кинематографија, за филмот да биде трајна вредност, а не само повремена радост.
Филмот „Павиљон“ е црна комедија која раскажува за станарите на истоимен дом за стари лица, кои по години злоупотреба и понижувања решаваат да се бунат со оружје. Тие го заземат домот, земаат персонал за заложници и влегуваат во конфликт со властите. Режисерот Мустафиќ истакна дека филмот не нуди утеха, туку поставува важни прашања за човековото достоинство и институционалните неправди.
На црвениот тепих пред отворањето се појавија бројни актерски и културни имиња, спортски ѕвезди и претставници на невладини организации. Стелан Скарсгард, годинашен добитник на Почесното Срце Сараева, изјави дека „го сака Сараево“ и дека очекува интересни филмови и средби со инспиративни луѓе.
Оваа година, SFF ќе понуди 227 филмови и серии од 65 земји, од кои 46 се светски и 8 меѓународни премиери, во рамките на 22 фестивалски програми кои траат до 22 август. Жирито на натпреварувачката програма за игран филм го сочинуваат режисерот и сценарист Сергеј Лозница, актерот Драган Миќановиќ, режисерот и актер Емануел Парву, режисерката и сценаристка Ена Сендијаревиќ и фестивалската директорка Триша Тетл.
Главниот спонзор на фестивалот е UNIQA, која официјално го осигурува Сараевскиот филмски фестивал.
Сараевскиот филмски фестивал останува еден од најзначајните културни настани во регионот, место каде што филмот не само што се гледа, туку и зборува за општествените предизвици и нуди простор за дебата и промена.
