Кучињата се верни придружници на луѓето откако сме ги припитомиле како први домашни животни, потекнувајќи од сивите волци, иако точниот период, место и причина за тоа сè уште не се целосно разјаснети. Новите генетски истражувања сега го идентификуваа најстарото познато куче, кое датира од пред 15.800 години.
Ова куче е идентификувано врз основа на коски пронајдени на локалитетот Пинарбаши во Турција, засолниште во карпа што го користеле древни ловци-собирачи. Според истражувачите, тоа е околу 5.000 години постаро од претходно најстариот генетски потврден примерок.
Староста на кучето од Пинарбаши, како и неколку други речиси подеднакво стари примероци пронајдени на други локации во Европа, покажува дека кучињата веќе биле широко распространети и важен дел од човечката култура илјадници години пред појавата на земјоделството.
Новите откритија се претставени во две научни студии објавени во списанието Nature.
Кучиња постоеле во западна Евроазија пред 18.000 години
Вилијам Марш, постдокторски истражувач во Лабораторијата за древна геномика при Институтот „Френсис Крик“ во Лондон и еден од главните автори на истражувањето, изјави дека ДНК доказите покажуваат дека кучињата биле присутни на различни места во западна Евроазија пред 18.000 години.
„Претпоставуваме дека популациите на кучиња и волци се разделиле многу порано, веројатно пред последниот глацијален максимум (ледено доба), односно пред повеќе од 24.000 години. Сепак, мора да се нагласи дека постои значително ниво на неизвесност“, рече Марш.
Кучето, кое потекнува од древна популација волци одвоена од современите волци, било првото животно што човекот го припитомил. Подоцна следеле козите, овците, говедата и мачките.
„Кучињата беа со нас додека луѓето поминуваа низ големи животни промени и создаваа сложени општества“, изјави генетичарот Андерс Бергстром од Универзитетот Источна Англија во Англија, главен автор на второто истражување.
„Интересно е што, за разлика од повеќето други домашни животни, кучињата немаат секогаш јасно дефинирана улога. Можеби нивната најважна функција е едноставно – друштвото“, додаде тој.
Најголемо истражување: 46 кучиња и 95 волци
Бергстром и неговиот тим анализирале 216 древни остатоци стари од 46.000 до 2.000 години од Белгија, Данска, Франција, Германија, Холандија, Шкотска, Шведска, Швајцарија и Турција.
Со нова генетска метода успеале да идентификуваат 46 кучиња и 95 волци.
Ова е најголемото истражување од ваков тип досега.
Најстарото куче во оваа анализа датира од пред 14.200 години и е пронајдено во пештерата Кеслерлох во Швајцарија. Истражувањето покажува дека раните европски кучиња делат потекло со кучињата од Азија и остатокот од светот, што значи дека не се работи за повеќе одделни процеси на припитомување.
Кучињата биле погребувани со луѓе и хранети со риба
Кучето од Пинарбаши открива колку ловците-собирачи ги ценеле своите животни.
„Во Пинарбаши имаме погреби и на луѓе и на кучиња – тие биле закопувани заедно“, вели Марш.
Постојат и докази дека луѓето ги хранеле своите кучиња со риба. Истражувањето идентификувало пет кучиња стари меѓу 15.800 и 14.300 години, вклучително и примероци од пештерата Гоф кај Чедар во Англија.
Во оваа пештера се пронајдени и докази за постмортални обработки на човечки тела, вклучително и канибализам како дел од погребни ритуали. Слични траги, иако не со сигурност за консумација, се забележани и кај остатоците од куче.
Поблиски до модерните раси отколку до арктичките кучиња
Утврдено е дека кучињата од Пинарбаши и пештерата Гоф се поблиски до предците на денешните европски и блискоисточни раси (како боксер и салуки), отколку до арктичките раси како сибирски хаски.
Освен за друштво, древните кучиња веројатно помагале во ловот или служеле како чувари – некаков „алармен систем“ во ледено доба.
Сепак, тие веројатно сè уште многу наликувале на волците од кои потекнуваат.
Мистеријата сè уште не е решена
„Прашањата кога, каде и зошто луѓето ги припитомиле кучињата остануваат во голема мера неодговорени“, заклучува Бергстром.
„Сметаме дека тоа најверојатно се случило некаде во Азија, но точната локација сè уште не е утврдена.“
