Остатоците се пронајдени во рудник за јаглен во близина на градот Гождница, во регионот Долна Шлеска, на југозападот на Полска. Според експертите, станува збор за вид кој живеел за време на средниот миоцен – геолошки период што траел од пред околу 23 до 5 милиони години.
Фосилите вклучуваат делови од череп, заби и делови од скелетот, а првичните анализи укажуваат дека најверојатно станува збор за претставник на фамилијата гавијали или негов близок роднина. Овие крокодили во тоа време живееле во потопла и повлажна клима, каква што тогаш преовладувала во Европа.
Научниците нагласуваат дека ова откритие е од особено значење бидејќи дава нов увид во тоа како се ширеле овие влекачи низ Европа и како се прилагодувале на промените во животната средина. Посебно истакнуваат дека вакви наоди во Европа се многу ретки и можат да се избројат на прстите од една рака, што го прави овој пронајдок мошне вреден за европската палеонтологија.
Според полската телевизија TVP World, ова е најсеверниот досега познат доказ за постоење на крокодили од времето на миоценот.
Истражувањето продолжува, а тимот се надева дека со понатамошни ископувања ќе пронајде уште фосилни остатоци што ќе помогнат во попрецизно утврдување на видот и реконструкција на неговото животно опкружување.
