Египетските власти објавија дека ја откриле гробницата на кралот Тутмос II, последниот исчезнат водач на 18-та египетска династија која владеела повеќе од два века, од 1550 до 1292 година п.н.е.
Генералниот секретар на египетскиот Врховен совет за антиквитети, Мохамед Исмаил Калед, го опиша откритието како едно од најзначајните во последните децении.
„Ова е првпат да биде откриен погребен мебел што му припаѓа на Тутмос II бидејќи такви предмети не постојат во музеите низ светот“, рече тој.
Шефот на египетската мисија Мохамед Абдел Бадеи изјави дека и покрај значењето на откритието, гробницата е во лоша состојба бидејќи била поплавена веднаш по смртта на кралот.
„Водата предизвикала штета и сериозно влошување, што доведе до губење на многу оригинални карактеристики за кои се верува дека биле преместени во античко време“, рече тој.
Археолошки тимови спасија делови од фрески со сини натписи, жолти ѕвезди и елементи од важен религиозен текст користен во фараонските гробници.
