Најголемата јапонска авиокомпанија, „Ол Нипон ервејс“ (АНА), денес објави дека откажала 65 од своите домашни летови поради проблем со софтверот што влијае на илјадници авиони на „Ербас“ низ целиот свет.
Потребни се поправки на софтверот за 34 авиони, а се очекува откажувањата на летови да влијаат на околу 9.400 патници што го користат аеродромот Ханеда во Токио, како и на оние во Тотори, Сага и други префектури, соопшти АНА, објави денес „Кјодо“.
Втората голема јапонска авиокомпанија, „Јапан ерлајнс“, соопшти дека нејзината флота на авиони не е засегната од проблемите со софтверот.
„Ербас“ претходно соопшти дека открил дека интензивното сончево зрачење може да ги оштети податоците што се критични за функционирањето на контролите на летот.
Многу авиокомпании, вклучувајќи ги изиџет, Бритиш ервејс, Ер Лингус, Луфтханза, Американ ерлајнс, Делта и Виз ер, потврдија дека се погодени од проблемот со софтверот во авионите од серијата Ербас А320.
Портпаролот на Ербас претходно изјави за Скај њуз дека околу 6.000 авиони ќе треба да го ажурираат софтверот и дека за повеќето авиони ажурирањето ќе трае од два до три часа, додека за некои модели ќе биде потребна и нова опрема.
