На 19 февруари (четврток) во 12 часот во галерија ОСТЕН ќе биде отворена групната изложба на слики, цртежи и објекти „ОСТЕНОВИ УМЕТНИЦИ НА ГОДИНАТА 2025“. Настанот претставува годишен избор на автори што ја одбележале изминатата година со својата креативност и уметничка доследност.
На изложбата учествуваат: Жанета Вангели, Мице Јанкуловски, Синиша Кашавелски, Блаже Крстаноски Блажески, Свето Манев, Миро Масин, Ристо Мијакоски, Томе Мишев, Данчо Ордев, Станко Павлески, Ирена Паскали, Симонида Филиповска Китановска, Роберт Цветковски и Ана Трајковска – добитничка на Наградата за млад уметник од Фондацијата Јанкуловски.
Манифестацијата има за цел да го поттикне развојот на македонската современа уметност и да создаде простор за дијалог меѓу различни генерации и естетики. Според организаторите, изложбата не е само презентација на дела, туку средба на визии, идеи и емоции што го обликуваат актуелниот уметнички контекст.
Годишниот избор на ОСТЕН се доживува како признание за постигнатото, но и како пресек на динамичниот и разновиден уметнички дух што се развива во земјата. Иако авторите доаѓаат од различни дисциплини и творечки искуства, нивните дела создаваат заедничка визуелна целина што го рефлектира современото културно и уметничко наследство.
Изложбата ќе биде отворена за јавноста во галерија ОСТЕН, а влезот на отворањето е слободен.
