По гасењето на светлата на сцената на доделувањето на Оскарите 2026, холивудската елита се упати кон ексклузивниот Governors Ball, официјалниот after-party на Академијата, каде ја дочека вистинска гозба. Веќе 32. година по ред, кулинарската магија е дело на славниот шеф Wolfgang Puck и неговиот тим составен од 75 готвачи, 45 слаткари и 325 членови на персоналот.
Тимот на Пак подготви раскошен мени со повеќе од 70 различни јадења, со цел да ги задоволи гладните ѕвезди кои често пристигнуваат на забавата со апетит.
На менито оваа година се наоѓаат и неколку иновации. Посебна атракција е „izakaya“ станицата со јадења инспирирани од јапонската pub кујна, како и автентичниот италијански апарат за gelato кој служи свежо подготвен сладолед.
Количините на намирници се импресивни. За вечерата ќе се подготват 600 рачно направени пици, 3.000 agnolotti со артичока и 2.000 мини чоколадни копии на Оскарите. За финалниот златен сјај на статуетките ќе се потрошат скоро осум литри 24-каратно течено злато. Исто така, ќе се користат 91 кг рибеј стек, 136 кг домашно пушен лосос, 14 кг Калуга кавијар, 227 кг шумски печурки, 91 кг Nishiki ориз и 181 кг избрани сирења.
„Сè е во квалитетот на состојките и јадењата,“ објаснува Пак. „Мораме да готвиме за 1.500 луѓе и се држиме до едноставноста. Не ни се потребни десет сосови покрај тоа.“
Иако менито изобилува со елегантни и префинети јадења, омилените се оние кои даваат чувство на удобност. „Удобната храна секогаш е популарна, како нашата пица со пилешко, пицата со пушен лосос, макарони со сирење или мини Wagyu бургер,“ додава Пак. Гостите ретко сакаат големи промени, па дури и кога тој еднаш се обидел да ја отстрани пицата од менито, побарале каде е нивната омилена станица за пица.
Покрај богатата понуда на храна, гостите имаат на располагање и широк избор пијалоци. За прославата се обезбедени 1.700 шишиња шампањ, доволно за околу 7.000 чаши. „Ќе уживаат во нашите вина,“ изјавил принцот Robert of Luxembourg, претседател и извршен директор на Domaine Clarence Dillon.
За крај, Пак потврди дека вишокот храна од забавата ќе биде дониран и поделена во Los Angeles Skid Row, област со голема популација на бездомници, додавајќи хуманитарен белег на настанот.
