Грчки и либериски бродови се првите што поминаа низ Ормускиот теснец по стапувањето на сила на примирјето, што се смета за прв конкретен сигнал за смирување на тензиите во регионот. Станува збор за трговски бродови кои транспортираат нафта и енергенси, а нивното безбедно минување е клучно за стабилизирање на глобалните пазари.
Во изминатите недели, поминувањето низ теснецот беше значително ограничено поради конфликтот, со засилени контроли и ризик за напад, што ги натера многу компании да ги пренасочат или одложат своите испораки.
Со почетокот на примирјето, пловниот сообраќај постепено се нормализира, но експертите предупредуваат дека состојбата и понатаму останува кревка. Секое ново нарушување може повторно да го затвори овој клучен морски коридор.
Ормускиот теснец има огромно значење за светската економија, бидејќи низ него поминува значителен дел од глобалниот извоз на нафта. Токму затоа, дури и ограничено отворање веднаш влијае врз цените на енергенсите и стабилноста на пазарите.
