Главната опозициска партија во Танзанија, Чадема, објави дека околу 700 лица се убиени за време на тридневните протести кои избувнаа поради претседателските избори во земјата. Демонстрациите започнаа во средата, на денот на изборите, како реакција на — како што тврдат демонстрантите — систематско задушување на опозицијата и исклучување на клучни кандидати од изборната трка.
Портпаролот на Чадема, Џон Китока, за агенцијата Франс-прес изјави дека само во Дар ес Салам се убиени околу 350 лица, а во Мванза повеќе од 200, додавајќи дека вкупниот број жртви би можел да надмине 700 бидејќи дел од убиствата се случуваат за време на ноќниот полициски час.
„Владата мора веднаш да престане да ги убива нашите демонстранти. Бараме формирање привремена влада која ќе подготви пат за слободни и фер избори“, порача Китока.
Независен безбедносен извор за Франс-прес потврдил дека има извештаи за над 500 загинати, додека Амнести Интернешнл објави дека добила податоци за најмалку 100 убиени. УН, преку Канцеларијата на високата комесарка за човекови права (OHCHR), изразија „длабока вознемиреност“ поради насилството и потврдија вистинити извештаи за смртни случаи во Дар ес Салам, Шињанга и Морогоро, каде што безбедносните сили користеле бојна муниција и солзавец.
Од почетокот на изборите, властите воведоа полициски час и блокада на интернетот, потег потврден и од глобалниот монитор NetBlocks. Началникот на војската, генерал Џејкоб Џон Мкунда, ги нарече демонстрантите „криминалци“ и најави дека безбедносните сили ќе ја преземат контролата врз ситуацијата.
Изборите се одржаа во атмосфера на зголемена репресија и политички прогон. Во април, Тунду Лису, потпретседател на Чадема, беше уапсен и обвинет за предавство и кибер-криминал, а неговата партија подоцна беше дисквалификувана од изборите. Минатиот месец, Лухага Мпина, лидер на другата опозициска партија ACT-Wazalendo, исто така беше исфрлен од трката, оставајќи ја претседателката Самија Сулуху Хасан практично без вистински противници.
Правниците за човекови права во Танзанија ја осудија прекумерната употреба на сила, а адвокатот Тито Маготи изјави дека е „неоправдано што државата пука врз својот народ“.
„Народот нема избор кога изборниот процес е однапред одреден. Тоа не е демократија“, предупреди Маготи.
Ситуацијата во Танзанија се оценува како една од најкрвавите политички кризи во последните децении, со стравувања дека насилството ќе продолжи ако меѓународната заедница не реагира со посредство и притисок врз властите во Дар ес Салам.
Извор: Index.hr
