Американската компанија за развој на вештачка интелигенција OpenAI воведе нов сет правила за корисници на четботовите помлади од 18 години, кои вклучуваат ограничувања во разговорите на теми поврзани со сексуалност и самоповредување, соопшти извршниот директор Сем Алтман.
Компанијата истакна дека „безбедноста е поважна од приватноста и слободата за тинејџерите“ и дека малолетните корисници мора да бидат дополнително заштитени, пренесе TechCrunch.
Алтман нагласи дека OpenAI ќе развие долгорочен систем за разликување на корисници постари и помлади од 18 години, при што во сите нејасни случаи ќе се применуваат построги правила.
Според новите насоки, ChatGPT повеќе нема да учествува во „флерт разговори“ со тинејџери, а дополнителни мерки на претпазливост се воведени и при дискусии за сценарија поврзани со самоубиство.
Ако малолетник користи ChatGPT за замислување на суицидални ситуации, системот ќе се обиде да стапи во контакт со родителите, а во особено сериозни случаи и со локалната полиција. Родителите кои ќе го поврзат својот налог со оној на детето добиваат можност да подесуваат „време на блокада“ кога ChatGPT нема да биде достапен и да бидат известени ако вештачката интелигенција процени дека тинејџерот е во опасност.
Новите мерки се воведуваат во контекст на тужби поради смртта на малолетниот Адам Рејн, кој извршил самоубиство по неколку месеци комуникација со ChatGPT.
Извор: N1info.rs
