Американската компанија за вештачка интелигенција OpenAI планира да ги обедини своите клучни производи, апликацијата ChatGPT, платформата за програмирање Codex и веб-прелистувач во една единствена десктоп „суперапликација“.
Целта на овој потег е да се поедностави корисничкото искуство и да се оптимизираат ресурсите, откако компанијата заклучила дека има премногу одделни производи кои ја забавуваат работата и развојот.
Претседателот на компанијата, Greg Brockman, привремено ќе го надгледува процесот на интеграција, додека директорката за апликации Fidji Simo ќе го води продажниот тим во периодот пред лансирањето.
Во интерна порака до вработените, Симо посочила дека фрагментацијата на производите ја отежнува постигнувањето на посакуваниот квалитет и ја намалува ефикасноста.
Една апликација за сè
Раководството на OpenAI верува дека обединувањето на алатките ќе помогне во подобро искористување на ресурсите, особено во услови на засилена конкуренција од компании како Anthropic и Google.
Компанијата стекна глобална популарност по лансирањето на ChatGPT во 2022 година, а оттогаш прерасна во една од најбрзо растечките технолошки компании во светот.
Во изминатите месеци, OpenAI претстави низа нови производи и искуства, вклучувајќи ја и платформата Codex, како и сопствен прелистувач.
Минатата година компанијата ја ангажираше Fidji Simo, поранешна директорка на Instacart, за да го води одделот за апликации. Таа има клучна улога во насочувањето на компанијата кон производствена дисциплина и подготовка за потенцијално јавно излегување на берза (IPO), кое би можело да се случи веќе оваа година.
Извор:
Hina / The Wall Street Journal
