OpenAI размислува за лансирање на нова социјална мрежа за да се натпреварува со X на Илон Маск и Instagram на Мета, потврди за CNBC извор запознаен со плановите.
Проектот се уште е во рана фаза, изјави изворот кој побара да остане анонимен поради доверливоста на информациите. Идејата се заснова на огромната популарност на најновата алатка за генерирање слики, што предизвика преоптоварување на серверите на OpenAI.
Проектот прв го објави The Verge. OpenAI официјално не ја коментираше информацијата.
OpenAI минатиот месец ја претстави својата најнова алатка за генерирање слики, која може да креира сè, од дијаграми, инфографици и логоа до бизнис картички и фотографии. Алатката исто така ви овозможува да ги користите постоечките слики како основа за создавање уметнички дела. На пример, персонализирани портрети на домашни миленици или ретуширани професионални фотографии.
Поточно, вирални станаа аниме-варијанти на кориснички фотографии, кои масовно се споделуваат на социјалните мрежи.
Директорот на OpenAI, Сем Алтман, самиот ја смени својата слика на профилот на X во слика генерирана од новата алатка.
„Одлично е да се види колку луѓето ги сакаат сликите во ChatGPT, но нашите графички картички се топат“, напиша Алтман на X минатиот месец, мислејќи на процесорите за графички картички кои ги напојуваат системите со вештачка интелигенција. Тој додаде дека функционалноста ќе биде привремено ограничена додека не стане поефикасна.
OpenAI се соочува со зголемена конкуренција на пазарот на генеративна вештачка интелигенција, вклучувајќи ја и компанијата xAI на Илон Маск, која минатиот месец објави дека ја презела контролата врз X. Алтман и Маск истовремено се вклучени во правен спор, кој во голема мера се врти околу преминот на OpenAI од непрофитна организација во профитна компанија.
Маск е еден од ко-основачите на OpenAI, основана во 2015 година како непрофитна истражувачка лабораторија. Минатиот месец федералниот суд ги отфрли обидите на Маск да ја спречи компанијата да се комерцијализира.
Во февруари, група предводена од Маск понуди 97,4 милијарди долари за да ја преземе контролата врз OpenAI, но понудата беше брзо одбиена.
Минатиот месец, OpenAI го затвори најголемиот приватен круг на финансирање во историјата на технолошката индустрија, собирајќи 40 милијарди долари по проценета вредност од 300 милијарди долари.
