OpenAI е блиску до лансирање на веб-прелистувач со вештачка интелигенција кој ќе го предизвика доминантниот на пазарот Google Chrome, прелистувачот во сопственост на компанијата Alphabet (GOOGL.O), изјавија за Ројтерс три лица запознаени со ова прашање.
Прелистувачот треба да се лансира во наредните недели и има за цел да користи вештачка интелигенција за фундаментално да го промени начинот на кој корисниците пребаруваат на интернет, според три лица интервјуирани. Ова би му дало на OpenAI подиректен пристап до еден од темелите на успехот на Google – податоците за корисниците.
Доколку 400-те милиони неделни активни корисници на ChatGPT го прифатат тоа
Chrome е важен столб на рекламниот бизнис на Alphabet, кој сочинува речиси три четвртини од нивните приходи, бидејќи Chrome обезбедува информации за корисниците што Alphabet ги користи за поефикасно и попрофитабилно насочување на рекламите, а исто така му овозможува на Google да насочува сообраќај кон својата платформа за пребарување по дифолт.
Според изворите, прелистувачот што го развива OpenAI е дизајниран така што одредени кориснички интеракции остануваат во рамките на вградено интегриран интерфејс за разговор сличен на ChatGPT, наместо корисникот да клика и да посетува надворешни веб-страници.
Прелистувачот е дел од пошироката стратегија на OpenAI за интегрирање на своите услуги во личниот и деловниот живот на корисниците, рече еден од изворите. OpenAI одби да коментира за оваа информација. Изворите побараа анонимност бидејќи не се овластени јавно да зборуваат на оваа тема.
OpenAI направи револуција, сега бараат простор за проширување
OpenAI, предводен од претприемачот Сем Алтман, ја потресе технолошката индустрија со лансирањето на својот AI четбот ChatGPT кон крајот на 2022 година. По почетниот успех, OpenAI се соочи со силна конкуренција, вклучително и од Google и стартапот Anthropic, и сега бара нови области за раст.
Во мај, OpenAI објави дека влегува во секторот за хардвер, плаќајќи 6,5 милијарди долари за да го купи стартапот за AI уреди io, основан од поранешниот главен дизајнер на Apple (AAPL.O) Џони Ив.
Според изворите, веб-прелистувачот би му овозможил на OpenAI директно да ги интегрира своите производи со вештачка интелигенција, како што е Operator, во искуството при прелистување на веб, дозволувајќи му на прелистувачот да извршува задачи во име на корисникот.
Пристапот на прелистувачот до веб-активноста на корисникот би го направил идеална платформа за „агенти“ на вештачка интелигенција кои можат да извршуваат задачи во име на корисникот, како што се правење резервации или пополнување формулари, директно во рамките на веб-страниците што ги користат корисниците.
Google Chrome е убедливо најмоќниот прелистувач
OpenAI се соочува со сериозен предизвик – Google Chrome, кој го користат повеќе од 3 милијарди луѓе, моментално држи повеќе од две третини од глобалниот пазар на прелистувачи, според фирмата за веб-аналитика StatCounter. Прелистувачот Safari на Apple (AAPL.O), кој има втор најголем пазарен удел, заостанува со 16%.
Како треба да изгледа прелистувачот на OpenAI?
Според два извори, прелистувачот на OpenAI е изграден на Chromium, кодот за прелистувач со отворен код на Google. Chromium е изворниот код за Google Chrome, но исто така и за многу конкурентски прелистувачи, вклучувајќи ги Microsoft (MSFT.O) Edge и Opera (OPRA.O).
Минатата година, OpenAI ангажираше двајца долгогодишни потпретседатели на Google кои беа дел од оригиналниот тим што го разви Google Chrome. Порталот The Information прв објави за нивното вработување, како и за фактот дека OpenAI претходно размислувал да направи свој прелистувач.
Извршен директор на OpenAI изјави во април дека компанијата би била заинтересирана да го купи Chrome доколку антимонополските регулатори бидат во можност да ја принудат неговата продажба.
Google не го понуди Chrome на продажба. Компанијата соопшти дека планира да поднесе жалба на пресудата со која се прогласува за монопол. OpenAI одлучи да развие свој прелистувач, наместо само „додаток“ за постоечкиот прелистувач на друга компанија, со цел да има поголема контрола врз податоците што може да ги собира, рече еден од изворите.
