Паралелно со ова, од северозапад пристигна густ црн чад од друг голем пожар во реонот на Блаце, каде што гори нискостеблеста шума со голема брзина. Ветерот ги насочи чадовите од двата пожари директно врз Бардовци, сериозно загрозувајќи ја безбедноста на жителите.
Во ваква ситуација, Општина Карпош упати итна препорака до жителите на Бардовци, доколку се во можност, да го напуштат населеното место во наредните 5 до 6 часа, сè додека не се стабилизира состојбата. „Густиот црн чад претставува особена опасност за деца, лица со респираторни проблеми, како и срцево болни“, стои во соопштението.
Еден од најризичните објекти – Психијатриската болница во Бардовци – веќе беше директно загрозен од ширењето на огнот. Благодарение на навремената реакција на противпожарните служби, ЦУК и персоналот на болницата, сите пациенти и вработени беа безбедно евакуирани.
„Пожарот е локализиран, но чадот и натаму е интензивен. Хеликоптерот на МВР останува ангажиран на гаснење на пожарот во Блаце“, соопштија од Центарот за управување со кризи. На терен беа и директорот на болницата, Иса Абдулаи, како и директорот на ЦУК, кои ја координираа евакуацијата.
Два пожари – еден од можеби криминално потекло, друг предизвикан од природни услови – уште еднаш ја ставија под лупа подготвеноста на системот за итни интервенции. Благодарение на брзата реакција трагедија беше избегната, но останува отворено прашањето: дали се прави доволно за навремена заштита на урбаните и ранливите заедници во услови на климатски кризи и човечка небрежност? Општина Карпош најави дека ќе продолжи будно да ја следи ситуацијата и навремено ќе ги известува граѓаните за понатамошен развој на ситуацијата.
